Abşeronun baş memarı Akif Əliyev “Yeni Bakı” haqqında dediklərini niyə danır? – FOTO, AUDİO

2016-09-08 /legion.az

(Aprelin 26-da Bakı Appelyasiya Məhkəməsində məsələ ilə bağlı növbəti məhkəmə iclası olacaq. Hakim İlham Əsədova etiraz məktubu da göndərmişəm və bu məqaləni də öz bloqumda dərc etməyi lazım bildim)

 “İlin Dörd Fəsli” MMC öz diqqətsizliyininin əvəzini Rüfət Əhmədzadə və Legion.az-dan çıxmaq istəyir?
Ümid edirik ki, İradə Gülməmmədova şöbə müdiri Akif Əliyevin ikili davranışına səssiz qalmayacaq…

Avqustun 30-da Legion İnformasiya Agentliyinə Nərimanov Rayon Məhkəməsindən məktub gəlib. Həmin məktubda bildirilir ki, “İlin Dörd Fəsli” MMC Legion İnformasiya Agentliyi və jurnalist Rüfət Əhmədzadəyə qarşı şirkətin işgüzar nüfuzuna ziyan vurmaq ittihamıyla iddia qaldırıb. Şirkətin bu iddiası iyulun 15-də Legion.az saytında dərc olunan ““Abşeronun baş memarı “Yeni Bakı”da binaların çökməsini təsdiqlədi” adlı məqalə ilə bağlıdır.

Bu məqalədə müəllifin yalnış məlumat verərək və Akif Əliyevin sözlərini təhrif edərək cəmiyyəti aldatdığını, “İlin Dörd Fəsli” MMC-nin işgüzar nüfuzuna ziyan vurdğunu hesab edən şirkət rəhbərliyi jurnalist Rüfət Əhmədzadədən və “Legion İnformasiya Agentliyi” MMC-dən 243 min 367 manat tələb edir. Bu iddia ilə bağlı olaraq, Nərimanov Rayon Məhkəməsinin hakimi Fuad Abdıyev sentyabrın 5-də saat 14:15-ə hazırlıq iclası təyin edib. Əvvəla qeyd edək ki, iddia ərizəsində sözügedən yazının başlığı da düz qeyd olunma64f49BINAyıb. Yazının başlığı legion.az saytında ““Yeni Bakıda” binaların çökməsini təsdiqlədi” yox, “Abşeronun baş memarı “Yeni Bakı”da binaların çökməsini təsdiqlədi” olaraq verilib. Digər tərəfdən, nə Rüfət Əhmədzadə Nərimanov rayonunda qeydiyyatdadır, nə də “Legion İnformasiya Agentliyi” MMC-nin məsələyə aidiyyatı yoxdur.
Çünki 2016-cı il iyulun 15-də “Abşeronun baş memarı “Yeni Bakı”da binaların çökməsini təsdiqlədi” başlıqlı məqalə Legion.az saytında dərc olunarkən, bu sayt “Legion İnformasiya Agentliyi” MMC-nin nəzdində olmayıb. “Legion İnformasiya Agentliyi” ilə heç br əlaqəsi olmayan jurnalist Rüfət Əhmədzadə dəfələrlə “Yeni Bakı” komendantı Ehtiram Yusifovun və “İlin Dörd Fəsli” MMC-nin nümayəndələrinin fikrini işıqlandırıb. Rüfət Əhmədzadə obyektivlik nümayiş etdirərək, “İlin Dörd Fəsli” MMC ilə, eləcə də Fövqəladə Hallar Nazirliyi ilə əlaqə saxlayıb.

FHN əməkdaşları sakinlərin müraciət etməsinin vacib olduğunu deməsindən sonra, tərəfimizdən sakinlərə bu tövsiyə çatdırılıb və bir neçə sakin FHN-in “Qaynar Xətti”nə müraciət edərək, öz narahatlıqlarını bildiriblər. FHN-in Tikintidə Təhlükəsizliyə Nəzarət üzrə Dövlət Agentliyinin əməkdaşları məhz SAKİNLƏRİN ŞİKAYƏTİ ƏSASINDA “Yeni Bakı” yaşayış kompleksinə getmiş və vizual baxışla rəy tərtib etmişdilər. Bu müraciəti də biz öz saytlarımızda işıqlandırmışıq.
Həmçinin, iyulun 18-də qanunvericiliyin tələblərinə uyğun olaraq, “İlin Dörd Fəsli” MMC-nin ulviyye.aliyeva@idfbaku.com adlı korporativ elektron poçt ünvanından gələn münasibəti dərc etmiş, şirkət nümayəndəsinin bizə qarşı işlətdiyi ittihamları da etika çərçivəsində cavablandırmışıq. Oxucular Qafqaz Xəbər Agentliyi “Yeni Bakı” ilə bağlı ittihamlara cavab verdi” başlıqlı yazıya diqqət etsələr görərlər ki, heç bir firma blankında olmayan, sonda təkzib müəllifinin vəzifəsi, imzası və ya əlaqə nömrələri qeyd olunmayan məktubda aşağıdakı tələb yer alır: “Bizim mövqemizi işıqlandırmağınızı tələb edirik.  Bütün lazımi sənədlərin elektron variantını və hadisənin təffərrüatlarını sizə yazılı şəkildə göndərə bilərik”.
Lakin iyulun 16-dan ay yarım vaxt keçib və “İlin Dörd Fəsli” MMC bütün şikayətlərə, narazılıqlara, hətta özlərinin “böhtan” adlandırdıqları informasiyalara heç bir şəkildə sübutlu-dəlilli münasibət bildirməyib, yazılı şəkildə heç bir “təfərrüat” göndərməyib. Beləliklə, sual yaranır: İlin Dörd Fəsli” MMC öz diqqətsizliyininin əvəzini Rüfət Əhmədzadə və Legion.az-dan çıxmaq istəyir? Onların münasibəti daim işıqlandırıldığı halda, indi bu məhkəmə iddiası hansı məqsəd güdür? Digər tərəfdən, “İlin Dörd Fəsli” MMC tərəfindən irəli sürülən iddia ərizəsində vurğulanır ki, FHN TTNDA-nın rəyində “sakinlərin heç birinin şikayətçi olmadığı” göstərilib. Əgər sakinlər şikayətçi deyildisə, o zaman FHN işçiləri niyə həmin yaşayış kompleksində baxış həyata keçiriblər? FHN TTNDA-nın “Yeni Bakı” rəhbərliyinə məktubunun fotoşəklini də oxuculara təqdim edirik. 14171944_290039244702809_2121985026_nHəmin məktubda agentliyin rəis müavini Elxan Əsədov bəzi çatışmazlıqların olduğunu bildirir və onların tez bir zamanda aradan qaldırılmasını xahiş edir. Deməli, çatışmazlıqlar var. Biz inşaat firması deyilik, memarların həmkarlar ittifaqı da deyilik, eləcə də binalarda çatları görüb narahat olan sakinlər ekspert deyil. Hər hansı məsələni araşdırıb aydınlaşdırmaq isə bizim vəzifəmiz və konstitusyon hüququmuzdur.
“İlin Dörd Fəsli” MMC sakinlərlə və mətbuatla münasibət qurmağı, anlaşılmazlıqlara aydınlıq gətirməyi bacarmırsa, “Yeni Bakı”dan mənzil alan vətəndaşların müqaviləni ləğv etmək tələbi qaldırmasında bizim nə günahımız var? “İlin Dörd Fəsli” MMC məhkəmə iddiasında əlində əsas kimi “Abşeronun baş memarı Akif Əliyevin “çökmə əlamətləri” ifadəsini dilinə gətirməməsi”ni götürüb, lakin Qafqaz Xəbər Agentliyinin “Youtube” kanalında yerləşdirilən audioyazıdan aydın olur ki, Akif Əliyev bu sözləri bildirib. Jurnalist telefon söhbətini yazıya çevirərkən, məzmunu yığcamlaşdırmaq və cümlə quruluşlarına dəyişiklik etmək hüququna malikdir. Əgər burda fikirlər təhrif olunmursa, deməli, narahatlıq üçün də hüquqi əsas yoxdur.mTHgjzUQ-1
Avqustun 30-da Kavkaznews.az-da dərc olunan yazıdançıxarışı oxuculara bir daha təqdim edirik: Məqalədə “Yeni Bakı” yaşayış kompleksindəki bəzi binalarda çatların müşahidə olunmasıyla bağlı sakinlərin müraciəti işıqlandırılıb. Məqalədə həqiqətən də Akif Əliyevdən aşağıdakı sitat gətirilib: “Bəli, “Yeni Bakı”dakı vəziyyətlə tanış olmuşuq, araşdırmışıq. Həqiqətən də çatlar var, binalarda çökmə əlamətlərinin olduğunu müəyyən etmişik”.
“Bəli, mən Rüfət Əhmədzadə ilə müsahibə zamanı həqiqətən də demişəm ki, “Yeni Bakı” şəhərciyindəki vəziyyətlə tanış olmuşam. Mən binalarda çatların olduğunu da demişəm. Amma çökmə əlamətləriylə bağlı heç nə deməmişəm. Mən bunu necə müəyyən edə bilərdim? Mən layihə memarıyam, geoloq və ya konstruktor deyiləm ki, çökmənin olub-olmadığını müəyyən edim”, – deyə Akif ƏliyevKavkaznews.az-a bildirib.
A.Əliyevin sözlərinə görə, o binaların yaşayış üçün təhlükəlilik dərəcəsini FHN-in Tikintidə Təhlükəsizliyə Nəzarət üzrə Dövlət Agentliyi və ya Ekologiya və Təbii Sərvətlər Nazirliyi müəyyən edə bilər: “Mən vətəndaşların müraciəti əsasında o binaların yaşayış üçün təhlükəlilik dərəcəsini FHN-in Tikintidə Təhlükəsizliyə Nəzarət üzrə Dövlət Agentliyinə müraciət etdim. Agentliyin mütəxəssisləri dedilər ki, bu işlə məşğul olurlar. Onlar dedilər ki, bu məsələ ilə bağlı rəyimizi hazırlayırıq”.
“Bəs Ekologiya və Təbii Sərvətlər Nazirliyinə müraciət etmisiniz?” – deyə soruşduq. “Yox, bu mənim işim deyil”, – deyə Abşeronun baş memarı cavab verdi. Junalist Rüfət Əhmədzadə bizə bildirdi ki, o, Akif Əliyevin sözlərini təhrif etməyib: “Akif Əliyev həqiqətən də deyib ki, “Yeni Bakı”dakı binalarda çökmə əlamətləri var. Müsahibənin səs yazısını məhkəməyə təqdim etməyə hazıram”.
Biz jurnalist Rüfət Əhmədzadənin Legion İnformasiya Agentliyi tərəfindən bizə təqdim olunmuş Akif Əliyevlə müsahibəsinin səs yazısını dinlədik. Qeyd edək ki, müsahibə zamanı Akif Əliyev həqiqətən də bildirib ki, “Yeni Bakı” yaşayış kompleksindəki binalarda “çökmə əlamətləri var”. Akif Əliyev FHN-in Tikintidə Təhlükəsizliyə Nəzarət üzrə Dövlət Agentliyinə müraciət etdiyini də deyib. Biz öyrənmək istədik, FHN bu müraciəti araşdırıbmı?
“Akif Əliyev bizə “Yeni Bakı”dakı binalarla bağlı müraciət göndərməyib”, – deyə FHN-in Tikintidə Təhlükəsizliyə Nəzarət üzrə Dövlət Agentliyinin ümumi şöbəsinin əməkdaşı Gülnar Hüseynova bildirdi. Abşeronun baş memarı sonrakı telefon söhbətində FHN-in Tikintidə Təhlükəsizliyə Nəzarət üzrə Dövlət Agentliyinə məktubla müraciət etmədiyini dedi: “Mən onlara sadəcə zəng etmişəm”. “Mən sizin Rüfət Əhmədzadəyə verdiyiniz müsahibənin səs yazısını dinlədim. Orda siz həqiqətən də deyirsiniz ki, “Yeni Bakı”dakı binalarda çökmə əlamətləri var, – deyə qeyd etdik.
“Mən bunu deməmişəm. Sizinlə danışmağa vaxtım yoxdur. Vətəndaşları qəbul edirəm”, – deyə A.Əliyev dəstəyi asdı”. Oxucularda sual yarana bilər: Görəsən, Abşeronun baş memarı Akif Əliyev “Yeni Bakı” haqqında dediklərini niyə danır? Biz ümid edirik ki, tezliklə bu və digər suallara aydınlıq gətiriləcək və hansısa məmurun öz yaxasını kənara çəkdiyinə görə, jurnalist Rüfət Əhmədzadə məhkəmə qarşısında “cəmiyyəti çaşdıran, qərəzli məlumatlar yayan biri” kimi durmayacaq. Bu, həm də bir jurnalistin və onun təmsil etdiyi mətbu orqanın işgüzar nüfuzuna zərbə ola bilər. Eyni zamanda ümid edirik ki, İradə Gülməmmədova şöbə müdiri Akif Əliyevin ikili davranışına səssiz qalmayacaq…
Araz Məmmədov

Qafqaznews.az

Mövzu ilə bağlı linklər:

http://qafqaznews.az/2016/08/ilin-dord-f-sli-sirk-ti-legion-informasiya-agentliyini-m-hk-m-y-ver-bilm-z-audio/
http://legion.az/9729–ab%C5%9Feronun-ba%C5%9F-memar%C4%B1-yeni-bak%C4%B1-da-binalar%C4%B1n-%C3%A7%C3%B6km%C9%99sini-t%C9%99sdiql%C9%99di-%E2%80%93-ara%C5%9Edirma–foto–v%C4%B0deo.html
http://qafqaznews.az/2016/07/qafqaz-x-b-r-agentliyi-yeni-baki-il-bagli-ittihamlara-cavab-verdi-reaksiya-cavab/ http://qafqaznews.az/2016/08/must-r-k-c-miyy-t-yaradan-yeni-baki-sakinl-ri-t-zyiql-r-m-ruz-qalir-sikay-t-foto-video/
http://qafqaznews.az/2016/07/yeni-baki-da-yangin-cixislari-ayri-ayri-sakinl-r-satilir-foto-video/
http://qafqaznews.az/2016/07/yeni-baki-da-c-za-kampaniyasina-start-verildi-foto-video/ http://legion.az/9503–yeni-bak%C4%B1da-m%C9%99nzil-m%C3%BClkiyy%C9%99t%C3%A7il%C9%99ri-ramiz-mehdiyev%C9%99-m%C3%BCraci%C9%99t-etdil%C9%99r-m%C6%8Ftn.html
http://qafqaznews.az/2016/06/yeni-baki-sakinl-ri-dovl-t-bascisina-muraci-t-etdi/
http://qafqaznews.az/2016/05/yeni-baki-da-isiqsiz-qalan-sakinl-r-alternativ-enerji-axtarirlar-video/
http://qafqaznews.az/2016/05/yeni-baki-da-qalmaqal-dusdu-sakin-ozunu-yandirmaq-ist-di/
http://qafqaznews.az/2016/05/az-risiq-dovl-t-bascisinin-f-rmanina-qarsi-gedir/
http://qafqaznews.az/2016/04/yeni-baki-massivinin-sakinl-ri-ozbasinaliq-v-kobudluqdan-sikay-t-edir-video/
http://qafqaznews.az/2016/04/az-risiq-dan-yeni-baki-sakinl-rin-q-rib-cavab-gedin-prezident-sikay-t-edin/

Advertisements

Teistlər, ateistlər və aftafeistlər

Bir məclisə düşmüşdüm, 3-4 nəfər getdik bir otaqda cəmaət namazı qılmağa. Nəysə ki, gördüm bir nəfər alnını möhürün şəkilli hissəsinə sıxır (çırpır da demək olardı). Mənsə möhürü çevirmişdim. Nə isə, sonra bu qardaş mənə yaxınlaşıb ki, bəs məndən sənə qardaş məsləhəti, çalış möhür alnında iz buraxsın, hamı bilsin möminsən.

Elə bildim zarafat edir, amma alnına diqqətlə baxanda ciddi olduğunu anladım (qardaşın alnında yup-yumru bir qızartı var idi). “Lüzum görmürəm” dedim, müctəhidlərdən danışmağa başladı. Mübahisə etmədim, dedim çox sağ ol, yaxşı fikirdir. Məndən cüssəli olmasaydı, həvəslə basıb döyərdim, çünki başa salmaqla düzələcəyinə inanmıram (mübahisə vaxt itkisidir).Yaxşı da ki, idmançı deyiləm, hər tində dalaşardım… İndi belə bir cahil də namaz qılır, ziyalılar da.

Bəzi ateist gənclərimiz isə yığışıb ucdantutma dindarları söyür, Allaha inananların “şərrindən” dövlətə sığınırmış kimi, siyasi yaltaqlığı “maarifçilik”lə sintez etməyə qalxırlar…

Din dövlətdən ayrıdır, amma niyə inadla dinlə dövləti qarşı-qarşıya qoymaq istədiklərini anlamıram. Axı mənim heç bir ateistlə işim yoxdur, öz guşəmə çəkilib duamı-ibadətimi edirəm… İcmalardan, təriqətlərdən də uzağam…

Ailədə də şəxsən zorakılığa və məcburiyyətə qarşıyam. Amma siz bu cür ifratçılıqla cəmiyyətdə panika yaradırsınız. Əgər nə vaxtsa bu ölkədə islam inqilabı və ya ona oxşar bir şey olacaqsa, tək səbəbi o aqressiv və yekəxana ateistlər olacaq. Konkret şəxsləri tənqid edin, bəlkə, mən də dəstəklədim, kim bilir?

Təəssüf ki… Ateizmi aftafeizmlə səhv salanlar da var. Onlar hakimiyyətdən pay almaq naminə özlərini dövlət-vətən təəssübkeşi göstərərlər. Əslində, onlar əqidəsizlərdir.

Rüfət Əhmədzadə

https://rufatahmad.wordpress.com/

Şah İsmayılı davamlı tənqid edənlərin əsl məqsədi nədir?

“İnsan öz keçmişini inkar edəndə və onu pisləməyə başlayanda fəlakət yaranır”

Həqiqətən də, düşünürsünüzmü, Şah İsmayıl Səfəvinin adı (və ya şair təxəllüsüylə Xətai) niyə bu gün inadla müzakirələrə çıxarılır?

Bəlkə, kimlərsə, bütün səmimiyyətləri  ilə bu xalqın fikirlərində inqilab etməyə, stereotipləri qırmağa çalışırlar?

Bununla da, onlar xalqı “təmiz zehinlə” gələcəyə aparacaqlar?

Yoxsa, əksinə, dövlətçiliyimizə sevgimizin “çürük” olduğunu göstərməyə, xalqımızın qürur sütunlarını bir-bir qırmağa çalışırlar?

Bəli, Şah İsmayıl Səfəvi tariximizdə qürur sütunudur. Həm də, ən möhkəmindən…

Düz 5 əsr bundan əvvəl yaşayan, Azərbaycanın və Anadolunun türkmən tayfalarını ətrafına toplamaqla böyük bir dövlət quran Şah İsmayıl Səfəvi niyə bu qədər gözlərə “batır”, nəyə görə bu qədər “alim”in yuxusunu ərşə çəkdirir?

Son bir neçə ildə davamlı olaraq, müxtəlif şəxslər tərəfindən hədyan və absurd ittihamlar eşitməkdəyik.  Bu şəxslərə də, ən yüksək səviyyədə cavablar verilib. Akademik Ramiz Mehdiyevin də bu mövzuda tutduğu mövqeyi müsbət qarşılayıram. Və son günlər Şah İsmayıl haqqında fikir bildirməklə gündəmə gələn hörmətli professor Nizaməddin müəllimə də, oxucularıma da bu fikirləri bir daha oxumağı məsləhət görürəm.

“İnsan öz keçmişini inkar edəndə və onu pisləməyə başlayanda fəlakət yaranır. Öz keçmişindən məhrum olan insan mənəvi boşluq dilində danışmağa başlayır. O, nəsillərin varisliyindən kənarda qalır, bununla da nəinki tarixin vəhdətini, həm də tarixin özünü alt-üst edir. Öz keçmişi ilə həmrəyliyin yoxluğu inkişaf etmiş mənlik şüurunun olmamasına və deməli, milli mənafe və dəyərlərin başa düşülməməsinə bərabərdir” (Ramiz Mehdiyev, “Şah İsmayıl Xətai”, istinad: APA, 04 dekabr 2012-ci il).

Guya XXI əsrdə arzu etdiyimiz sivilizasiyaya, fikri inqilaba çatmışıq… Cəmiyyətimizdəki birliyi tamamilə bərpa etmişik… İndi qayıdıb 500 il əvvəl Şah İsmayılın niyə şiə təmayüllü dövlət qurduğunu sorğulayırıq.

Azərbaycan məzhəb və konfessiya savaşları yaşamayan tək-tük ölkələrdəndir. Kimlərsə, inadla ölkəmizin simasında “qırış” axtarmağa çalışır…

Düşünün, hələ XX əsrdə maarifçi ziyalılarımızı ən çox narahat edən insanlarımızın özünü “müsəlman milləti” kimi tanıması  idi… Və il olub 2017, BDU-nun professoru deyir ki, “Şah İsmayılın damarlarında xristian qanı axırdı, xristian dövlətlərinin təsirilə hərəkət edirdi”.

Professoru bir az danışdırsanız, Şah İsmayılın gündə neçə dəfə subaşına çıxdığını da həvəslə danışar. Hər şeydən xəbəri varmış kimi..

Başqa sözüm yoxdur.

Sözardı: Şəxsən, mənim fikrimcə, lap başdan biz səhv etmişik: Şah İsmayılı ölkəmizdə şair təxəllüsüylə yox, qurduğu səltənətin adı ilə əbədiləşdirməli idik – Şah İsmayıl Səfəvi kimi. Bəlkə, yanaşma da fərqli olardı. Xətaidə inadla xəta axtaranlar da az olardı.

Rüfət Əhmədzadə

Qafqaznews.az

Masazırı ucqar dağ kəndiylə səhv salanlar… – VİDEO

“Yeni Bakı” komendantlığının əməkdaşları sakinlərə xidmət göstərmək əvəzinə, “kəndxuda”lıq edirlər…

Artıq neçə ildir ki, Masazır qəsəbəsində, Bakıdan maksimum 10 kilometr aralıda “Yeni Bakı” adlı şəhərcik yerləşir. Yəni, paytaxtdan elə də uzaq deyil və bəzi ucqar dağ kəndlərinin yaşadığı problemləri bu şəhərcikdə axtarmaq məntiqsiz olardı. Amma nə təəssüf ki, hətta Xınalıq kəndinin qazla təmin olunduğu bir zamanda, “Yeni Bakı”da yüzlərlə mənzilin qazdan məhrum olması, vaxtaşırı müxtəlif bəhanələrlə sakinlərin işığının kəsilməsi barədə xəbərlər eşidirik.

Bu şəhərcikdəki binaların çat verməsi barədə məlumatlardan savayı, sosial şəbəkələr və mətbuatda yetərincə foto və video faktlara rast gəlmək olar. Lakin bu məlumatları işıqlandırmaq da baha başa gələn işdir. “Yeni Bakı”nı idarə edən “İlin Dörd Fəsli” MMC bu və digər məlumatları cəmiyyətə çatdıranları məhkəməyə verə, hətta 243 min “təzminat” da tələb edə bilər. Jurnalisti təhdid edən şirkət nümayəndəsi  əlini-qolunu sallayıb gəzəcək, şikayəti “araşdıran” DİN Baş MCMİ əməkdaşından  kimsə hesab soruşmayacaq, şikayətçi jurnalistə isə guya noyabr ayında “göndərilən” məktubun niyə hələ də çatmadığını kimsə izah edə bilməyəcək.

Bu günlərdə “Yeni Bakı” sakinləri qaz verilməməsinə etiraz edərkən, şəhərciyə müxtəlif jurnalistlər toplaşmışdı. Hətta “Meydan tv” əməkdaşları şəhərcikdən canlı yayım da etdilər. Həmin vaxt şəhərcikdə çəkilən bir video bu günlərdə sosial şəbəkələrdə paylaşıldı. Videoda kadrlar yeknəsək alınsa da, məsələ barədə oxuculara bir balaca məlumat vermək istərdim.

Səbuhi adlı “Yeni Bakı” komendantlığının əməkdaşı (komendant Ehtiram Yusifovun köməkçisi) eyvana “Binaya qaz verin, biz donuruq”plakatı asan sakinin evinə soxulmağa, həmin plakatı ordan “yığışdırmağa” çalışır. Lakin sakin etiraz edir və əlindəki işıqpulu çeklərini göstərir. Deyir ki, sizə görə, mən 400 manata yaxın işıqpulu verirəm, o pulu ödəyin, plakatı yığışdırım.

Sizcə, əziz oxucular, həmin gənc doğru demirmi? Onun əvəzində isə Səbuhi adlı komendantlıq işçisi hərbə-zorba danışmağa, təhqir etməyə başlayır. Utanmadan da, sakinlərə küçə səviyyəsində “lampoçka-patron” söhbətləri edir. Baxın, MİS-lər xidmət sektoruna daxildir. Özünü MİS-ə analoq sayan “Yeni Bakı” komendanlığının əməkdaşları vətəndaşlara xidmət göstərmək əvəzinə, onlarla kobud davranır, “kəndxuda”lıq edirlər…

Axı, 50-60 min manat pul verib mənzil alan, sayğaclara görə 700 manat ödəyən, hər ay heç bir VÖEN göstəricisi olmayan qəbz qarşılığında 30-40 manat kommunal ödəniş keçirən vətəndaş heç kimin təhkimli kəndlisi deyil… Feodalizm dövrünü çoxdan keçmişdik, deyəsən! Amma yox, “İlin Dörd Fəsli” MMC rəhbərliyi sakinlərə də, onların şikayətini işıqlandıran jurnalistlərə də feodal düşüncəsiylə yanaşır, şəhərcikdə çəkiliş aparan KİV nümayəndələrini təhqiramiz ifadələrlə qovmağa çalışır, heç bir qanuna məhəl qoymadan “şəxsi qanunlar” əsasında işləyir…

Görəsən, hörmətli şirkət rəhbəri Elnur Hüseynov söyüşcül nümayəndəsi Mehman Muradlıdan tutmuş həmin o “lampoçkataxan” Səbuhiyə qədər hər bir işçisini xüsusi kriteriyalar əsasında seçib? “İlin Dörd Fəsli”nin əməkdaşı olmaq üçün, insanları söymək, təhdid etmək, əl-qol atmaq lazımdır?… Elədirsə, Allah xeyir versin… Hər bir kəndə şəhərdən “papkalı”lar qonaq gələ bilər. Hətta eşitdiyimizə görə, son günlər o “papkalı” müəllimlər “Yeni Bakı” istiqamətini tez-tez tutmalı olublar.

Rüfət Əhmədzadə

Qafqaznews.az

Ağdamın “dəli”ləri və “anormal”ları haqqında – AUDİO


Daha nə oldu, bu rayonda mətbuata kim şikayət edirsə, deməli, başı işləmir?

Yanvarın 5-də telefon söhbəti zamanı mənimlə küçə üslubunda danışan və əri tərəfindən yandırılmış müəlliməni dolayısıyla “anormal” adlandıran (“baxın görün, o qadın normaldır?”, “Nəsə çatışmır” və s)  prokuror Rəfail Zeynalov Ağdam RİH başçısı Raqub Məmmədovun qudası imiş.

Olmaya, iki quda əl-ələ verib, rayonu “anormalxana”ya çevirməklə məşğuldurlar?..

Dayanın, əziz oxucular! Kimisə təhqir etmək, qərəzli tənqid atəşinə tutmaq məqsədim yoxdur.

Sadəcə, “məni adam bilib danışan” prokuroru mən də adam bildim, ondakı bu özgüvənin səbəblərini öyrənməyə çalışdım… Nəhayət, ağdamlı tanışlarım mənə dedilər ki, “qudasının rayonudur, gözün üstə qaşın var” deyən yoxdur… Baxın, burda barmağımı “Snickers” bilib, dişlədim. Bundan əvvəl Raqub Məmmədovun müavini Ağa Zeynalov ondan 5 min manat rüşvət alındığını, pulunu tələb edəndə isə özünün kanala atıldığını deyən bağça tərbiyəçisi Fəridə Vəliyevanı “ruhi xəstə” adlanırmışdı.

Keçən ilin yayında Ağdam RİH nümayəndəsi Hüseyn Əliyev 4 il çörəkpulusunu ala bilməyən bir xanım haqqında xoşagəlməz sözlər işlətmişdi. Bu və digər məqamlar hamısı faktdır və diktofon yazıları da var… Yəni, Ağdamdan kim şikayət edirsə, ya “dəli”dir, ya “anormal”, ya da “əxlaqında problemi var”…

Ümumiyyətlə, insan nə vaxt söyməyə, təhqir etməyə başlayır? Sadə bir cavab: Leksikonunda normal danışıq üçün söz ehtiyatı tükənəndə, ya da yerli-dibli olmayanda.

Adama deyərlər ki, daha nə oldu, bu rayonda mətbuata kim şikayət edirsə, deməli, başı işləmir? Əgər bütün narazıları “dəli” çıxarmaq çətindirsə, Raqub Məmmədov xüsusi “dəlixana” da təsis edərək, özünə və qohumlarına mane olan “dəli”ləri ora toplaya bilər.

İndi bilmirəm, Ağdamda “normal” vəziyyət necədir. Onu da bilmirəm ki, Ağdamın məmurlarından, polisindən, prokurorundan narazı qalanlar nə dərəcədə “psixi xəstə” və ya “anormal”dırlar. Mən jurnalistəm və işim vətəndaşların müraciətini qələmə almaq, araşdırmaqdır. Əgər Səhiyyə Nazirliyində müvafiq vəzifə tutsaydım, əlbəttə, o zaman vətəndaşların psixiatrik ekspertizadan keçilməsi üçün “göndəriş” yazardım.

Amma söhbət xatirinə, işi aşsın deyə… başqasının haqqında nalayiq sözlər işlətmək, böhtan atmaq, xüsusilə də, 33 il bu ölkə üçün vətəndaş yetişdirən bir müəllimənin normallığına şübhə salmaq… Əlbəttə, normal deyil!

İstər Ağdamda, istərsə də digər rayonda… Olmaz belə! Öz işinizi düzgün görə bilmirsinizsə, ən azından, mətbuatla normal danışıq bacarığınız yoxdursa – sadə insanları niyə alçaldırsınız?! Ümid edirəm ki, aidiyyatı olan şəxslər tənqidlərimdən nəticə çıxaracaq.

Əlbəttə, ümid varsa, adam da var, həyat da…

Qədir bilib deyirəm!

Rüfət Əhmədzadə

Qafqaznews.az

Mövzu ilə bağlı linklər:

“Ağdamda həyat yoldaşını yandıran kişini “günahsız” çıxardılar?”

Ağdam prokuroru əri tərəfindən yandırıldığını deyən qadını “anormal” hesab edir?

“Ağdam RİH başçısının müavini 5 min manat pulumu aldı, özümü də kanala atdırdı” – ŞİKAYƏT

Yandırılan müəllimənin direktoru: “O qadının bir anormallığını görməmişəm”

Səmimi söhbət

 

Statuslarımda afət-şair söhbəti edirəm, dost-tanış da mənə “şair” xitabı edir. Amma səmimi deyim, mən özümü şair (nazim) hesab etmirəm.

Çap edilən iki hekayə və mənsur şeirlər kitabım var, amma nəzm kitabım yoxdur. Şeirlərimi bəyənən də azdır və bunu etiraf etməkdən utanmıram. Lakin məni bəyənməyənlər də etiraf etməlidir ki, çox fərqli üslubum və fəlsəfəm var – sadəcə populist şairlərdən olmadığım, özümü reklam etdirmədiyim, efirlərdən birdəfəlik imtina etdiyim və bir-birini tərifləyənlərdən ibarət “vilka-lojka” çevrələrinə girmədiyim üçün o qədər populyar deyiləm.

Bu gün qızların xoşuna gəlmək, daha çox oxunmaq və efirlərə çıxıb məşhurlaşmaq üçün damar doğrayan həmkarlarım üçün isə çox üzülürəm.

Şablon sevgi şeirləriylə, heç bir metaforası-təşbehi olmayan misralarla, ciddi və kədərli fanatkalarıyla, hər statusa gələn 150-200 laykla öyünürlər… və ədəbiyyat tarixində iz salacaqlarına inanırlar. Vallah, məcbur deyil ey bizi oxusunlar. Əsas anlamaqdır.

Rəhmətlik sevgilim üçün yazdığım şeirlərimdə nə demək istədiyimi cəmi 2-3 nəfər anlayır, onlar da mənim köhnə dostlarımdır. Yəni, sizi anlamayacaq adamların gözünə girməyə çalışmayın. Nə fərqi var, Fatmanisə xanım sənin şeirindən təsirləndi, amma Ümbülnisə xanım təsirlənmədi… Şeir içdən gəlməlidir və mən içimdən gələni yazıb ürəyimi boşaldıram. Sadəcə paylaşıb yüngülləşmək ehtiyacı var, onu izah edə bilmirəm.

Amma əsas olan özümüz kimi olmaqdır, publika üçün əlləşən adamdan şair çıxmaz.

Rüfət Səid Əhmədzadə

“Su” üçün… – ŞEİR

rufat-topqapiXəyal qurmağa da qorxursan, anlayıram səni…
Azadlığın nə olduğunu bilməyən qadına
Necə tərif edim sevginin gözəlliyini…
Sən məcbursan məni elə uzaqda saxlamağa,
Mən məcburam səni ən yaxınımda xəyal etməyə.
Sən ömrünü də məcburiyyətdən yaşayırsan…
Daha səni heç nəyə məcbur etmək də olmaz.
Mən isə ömrümü məhrumiyyətdən yaşayıram.
Doyunca sevgi duya bilmədim deyə, ölmürəm…

Sevirsən ruhunun yaralı yerlərini sığallayan
Baxışlarımı!
Amma özümü sevməyə…
Nədənsə, çəkinirsən.
Sevirsən nə vaxtsa öldürüb dənizə atdığın
o saf qız uşağının qayıtmasını…
Elə bir xoş sözümlə.
Amma “günah” deyirsən.

Sən sevirsən
Övladını, məsələn.
Həyat yoldaşın isə
Sadəcə “övladının atası”dır.

Qəlbindəki boşluğun adını da qoya bilmirsən.
O boşluq civə kimi hər gün yeyir içini…
Həyatına necəsə rəng qata bilmişəmsə,
Bu rənglər niyə belə qorxuya salır səni?

Sən xəyal qurmağa belə qorxursan, anlayıram…
Hətta darıxmağa da cəsarətin çatmır ki!
Bir an xoşbəxt olaram “Ağlımdasan” sözündən…
Amma sonra üzüntü…
Qəlbin niyə bağlıdır?

Bəlkə, mən səhv edirəm…
Ürəyində mən varam…
Xəyalların da sonsuz…
Orda elə mən və sən…
Bəlkə də, sən haqlısan…
Bu yolun sonu yoxdur…
Di gəl ki, son verməyə
İkimiz də qorxuruq.

Bəlkə də, mən nankoram,
Əslində, həyatımın ən bəxtəvər anında
Səni bikarçılıqdan özümə dərd etmişəm?
Bəlkə, yalan demişəm, özümə də, sənə də…
Mən səni sevmirəm ki…
Sadəcə, susamışam,
Sadəcə, acımışam,
Sadəcə, gücüm bitib…
Sənə ehtiyacım var.

Rüfət Səid Əhmədzadə
17.10.2016